जालना जिल्ह्यातील राष्ट्रीय महामार्ग 753-एच वर ट्रक चालकांना लुटणाऱ्या टोळीतील तिघांना चंदनझिरा पोलिसांनी अटक केली असून, न्यायालयाने 26 जुलैपर्यंत पोलीस कोठडी सुनावली आहे.
जालना (प्रतिनिधी) | राष्ट्रीय महामार्ग 753-एच (जालना-राजूर-भोकर्डन रोड) वर ट्रक चालकांना लुटणाऱ्या एका गुन्हेगारी टोळीला चंदनझिरा पोलिसांनी अटक केली आहे. या प्रकरणातील तिघांना न्यायालयात हजर करण्यात आले असता, 26 जुलैपर्यंत पोलीस कोठडी सुनावण्यात आली आहे.
गेल्या काही काळात या मार्गावर रात्रीच्या वेळी अवजड वाहनांवर दगडफेक, गाड्या आडव्या लावून चालकांना अडवणे आणि त्यांच्यावर हल्ले करून लूट करणे अशा घटनांमध्ये वाढ झाली होती.
घटना कशी घडली?
23 जुलैच्या मध्यरात्री दीड ते दोनच्या सुमारास, राजस्थान राज्यातील दोन ट्रक चालकांच्या वाहनांचा पाठलाग स्कॉर्पिओ गाडीतून करण्यात आला. लुटीच्या प्रयत्नातून वाचण्यासाठी संबंधित ट्रक चालकांनी जवळील ‘सूरज पेट्रोलियम’ पंपात आश्रय घेतला. या ठिकाणच्या CCTV कॅमेऱ्यात संपूर्ण घटना कैद झाली.
पोलीसांची जलद कारवाई:
सीसीटीव्ही फुटेजच्या आधारे, चंदनझिरा पोलिसांनी केवळ काही तासांत खालील तिघांना अटक केली:
-
रवी देविदास जाधव (रा. पठार, देवळगाव)
-
तानाजी कारभारी कंठाळे (रा. तुपेवाडी)
-
विलास तुकाराम पवार (रा. बावणे पांगरी)
अटक केलेल्या आरोपींकडून ₹16,000 रोख रक्कम आणि गुन्ह्यात वापरलेली स्कार्पिओ गाडी जप्त करण्यात आली आहे.
न्यायालयीन सुनावणी:
गुन्हेगारांना जालना येथील न्यायालयात हजर केले असता, न्यायालयाने त्यांना 26 जुलै 2025 पर्यंत पोलीस कोठडी सुनावली.
पोलिसांचे कौतुकास्पद काम:
ही संपूर्ण कारवाई पोलिस निरीक्षक बाळासाहेब पवार यांच्या नेतृत्वाखाली करण्यात आली. त्यांच्या पथकात पोलिस उपनिरीक्षक एम.बी. स्कॉट, रवी देशमुख, मनसूब बेताळ, कृष्णा तंगे, प्रशांत देशमुख, राजेंद्र ठाकूर, राजेंद्र पवार, जोहरसिंग कलाणी, साई पवार, नवनाथ पाटील, सागर खैरे, आणि चालक संग्रामसिंह ठाकूर, काकासाहेब बोट यांचा समावेश होता.
➤ अशा बातम्यांसाठी ‘ लोकप्रश्ना न्यूज ‘ ला भेट देत राहा.
