जालना (प्रतिनिधी): जालना शहरातील चंदनझीरा पोलिस ठाण्याच्या हद्दीत पोलिसांनी मोठी कारवाई करत सुमारे साडे पाच लाख रुपयांची देशी व विदेशी दारू अधिकृत परवानगीने नष्ट केली. ही दारू वेगवेगळ्या गुन्ह्यांमध्ये जप्त करण्यात आली होती.
५० गुन्ह्यांमधील दारूचा नाश
पोलिसांनी दिलेल्या माहितीनुसार, चंदनझीरा पोलिस ठाण्याच्या कार्यक्षेत्रात वेगवेगळ्या ठिकाणी छापेमारी करून ५० प्रकरणांमध्ये ही दारू जप्त करण्यात आली होती. या कारवायांमध्ये जप्त करण्यात आलेली हजार रुपयांपेक्षा कमी व अधिक किमतीची देशी आणि विदेशी दारू पोलिस ठाण्यात अनेक दिवसांपासून जमा होती.
अधिकृत परवानगीने दारूचा नाश
दारू नष्ट करण्यासाठी उपविभागीय दंडाधिकारी व राज्य उत्पादन शुल्क अधीक्षक यांच्याकडून आवश्यक ती लेखी परवानगी घेण्यात आली होती. हजार रुपयांपेक्षा कमी किमतीची दारू उपविभागीय अधिकाऱ्यांच्या परवानगीने, तर हजार रुपयांपेक्षा अधिक किमतीची दारू उत्पादन शुल्क अधीक्षकांच्या परवानगीने नष्ट करण्यात आली.
पंचासमक्ष प्रक्रिया पूर्ण
ही कारवाई पोलीस निरीक्षक बाळासाहेब पवार यांच्या मार्गदर्शनाखाली पार पडली. यावेळी पोलीस नाईक मनसूब वेताळ, पीएसआय सैय्यद अफसर, रवी देशमुख आणि कडुबा सोनवणे आदी उपस्थित होते. दोन पंचासमक्ष सुमारे ५ लाख ५० हजार रुपयांची दारू नष्ट करण्यात आली असून याची संपूर्ण प्रक्रिया पंचनामा करून पूर्ण करण्यात आली.
अवैध दारूविरोधात पोलिसांची कडक भूमिका
या कारवाईतून अवैध दारू व्यवसाय करणाऱ्यांना मोठा इशारा देण्यात आला आहे. जप्त मुद्देमालाचा विनाकारण ताण वाढू नये, म्हणून पोलिसांकडून ही तातडीने केलेली प्रक्रिया कौतुकास्पद मानली जात आहे.
Read More : श्रीरामपूरमध्ये सराफा दुकान फोडणारे चार चोर जालन्यात अटकेत, 25 लाखांचा ऐवज जप्त
One thought on “जालना पोलिसांची मोठी कारवाई: साडे पाच लाख रुपयांची देशी-विदेशी दारू नष्ट”