जालना : शहरातील गांधी नगर भागात मोकाट कुत्र्यांच्या हल्ल्यात सात वर्षांच्या चिमुकलीचा मृत्यू झाल्याने संपूर्ण शहरात संतापाची लाट उसळली आहे. या घटनेच्या निषेधार्थ छत्रपती फाउंडेशनच्या वतीने महापालिकेविरोधात आज दुपारी ‘बेशरम आंदोलन’ छेडण्यात आले.
फाउंडेशनचे अध्यक्ष सुनीलभाई रत्नपारखे यांच्या मार्गदर्शनाखाली झालेल्या या आंदोलनात कार्यकर्त्यांनी महापालिकेच्या दालनात बेशरम झाड लावून निषेध व्यक्त केला. आंदोलनादरम्यान महापालिका आयुक्त संतोष खांडेकर गेटवर पोहचताच कार्यकर्त्यांनी जोरदार घोषणाबाजी करत त्यांच्या विरोधात रोष व्यक्त केला. परिणामी, खांडेकर यांनी आंदोलनस्थळावरून काढता पाय घेतला.
यावेळी फाउंडेशनचे अंकुश राजगिरे, किरण निरंतर, पट्टे बहादूर, विलास रत्नपारखे, दिलीप जाधव, गोलू कांबळे, सचिन क्षीरसागर, विशाल रत्नपारखे, आकाश खरात आदी कार्यकर्ते मोठ्या संख्येने उपस्थित होते.
शहरातील मोकाट कुत्र्यांचा प्रश्न दिवसेंदिवस गंभीर होत असून, प्रशासनाने याकडे तातडीने लक्ष द्यावे, अशी मागणी फाउंडेशनने केली आहे. अन्यथा आंदोलन अधिक तीव्र करण्याचा इशाराही यावेळी देण्यात आला.